Լեդի Գագան պաշտոն է ստացել Սպիտակ տանը. ԱՄՆ նախագահ Ջո Բայդենը նրան նշանակել է Մշակույթի և արվեստի կոմիտեի համանախագահ։ Այս մասին հայտարարել է Սպիտակ տան վարչակազմը։
Մամուլի հաղորդագրության համաձայն՝ Լեդի Գագան 13 Grammy մրցանակի դափնեկիր է, ինչը նրան դարձնում է «պատմության մեջ ամենահաջողակ կին երաժիշտներից մեկը»:
Նաև երգչուհին ընդգրկվել է Forbes ամսագրի կողմից աշխարհի ամենաազդեցիկ կանանց և Time ամսագրի կողմից հրապարակված աշխարհի 100 ամենաազդեցիկ մարդկանց ցուցակում։
Լեդի Գագան ակտիվորեն զբաղվում է նաև բարեգործական գործունեությամբ և հասարակական արշավներով։ Այսպիսով, 2020 թվականի համաճարակի սկզբում Լեդի Գագան հեռուստահամերգ կազմակերպեց Առողջապահության համաշխարհային կազմակերպության COVID-19 հիմնադրամի օգտին, որը հավաքեց ավելի քան 128 միլիոն դոլար:
Երգչուհին նաև ակտիվորեն աջակցել է Ջո Բայդենին իր նախընտրական քարոզարշավի ժամանակ, իսկ ավելի ուշ ելույթ է ունեցել նրա երդմնակալության ժամանակ, որտեղ երգել է ԱՄՆ հիմնը։
Ամերիկացի պրոդյուսեր Բրյուս Քոհենը, ով աշխատել է «Մեծ ձուկ» և «Ամերիկյան գեղեցկություն» ֆիլմերի վրա, Լեդի Գագայի հետ դարձել է կոմիտեի համանախագահ։
Արվեստի և մշակույթի կոմիտեն առաջարկում է գաղափարներ մշակութային քաղաքականության համար և կազմված է արվեստագետներից, գիտնականներից և բարերարներից՝ անձամբ ընտրված Միացյալ Նահանգների նախագահի կողմից:
