Այսօր Մոսկվայում հրաժեշտ տվեցին Ալեքսանդր Գրադսկուն։ Կոմպոզիտոր, երգիչ, “Голос” շոուի մրցավար։
Ալեքսանդր Գրադսկու հեռանալն իսկական ցնցում էր բոլորի համար։ Երաժշտի կոլլեգաները սոցիալական հարթակներում շարունակում են կիսվել ցավակցական խոսքերով՝ անգնահատելի համարելով Գրադսկու ավանդը։
Երաժշտին վերջին հրաժեշտ էին տալիս հազարավոր մարդիկ, այդ թվում նաև հայտնի գործընկերները։
Ռուսաստանի ժողովրդական արտիստը կյանքից հեռացել է 72 տարեկանում։ Մի քանի օր առաջ նրան ինսուլտի կասկածով շտապ տեղափոխել էին Մոսկվայի հիվանդանոցներից մեկը։
Գրադսկին համարվում է ռուսական ռոքի հիմնադիրներից մեկը։ Երաժիշտը ավարտել է Գնեսինների անվան երաժշտության և մանկավարժության ինստիտուտը։
1965 թվականին ստեղծել է «Սլավյանե»խորհրդային առաջին ռոք խմբերից մեկը։ Ընդհանուր առմամբ, Գրադսկու դիսկոգրաֆիան ներառում է տասնյակ ալբոմներ։ Նա աշխատել է մի շարք ռոք օպերաների ստեղծման վրա, եղել է բազմաթիվ ֆիլմերի երաժշտության հեղինակ, այդ թվում՝ “Романс о влюбленных”, “Узник замка Иф” հայտնի ֆիլմերը։
Նրա հեղինակած երաժշտությունն ու կատարումները հնչել են նաև մուլտֆիլմերում։
